Извештај на ЈО: Лани прислушувани и следени 365 лица, тајни агенти се инфилтрирале во криминални групи

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

Извештај на ЈО: Лани прислушувани и следени 365 лица, тајни агенти се инфилтрирале во криминални групи

31 мај 2026

• од Темелко Тошев

Значително зголемување на примената на посебни истражни мерки (ПИМ) бележи Јавното обвинителство во текот на изминатата година. Според најновиот извештај на обвинителот Ненад Савески, кој е испратен на разгледување во Собранието, лани биле издадени наредби за прислушување, тајно следење и снимање во вкупно 44 нови истражни случаи, со што биле опфатени дури 365 лица.

Ова претставува скок од над 25 отсто во споредба со 2024 година, кога вакви мерки биле применети во 35 случаи, но сепак е двојно помалку од рекордната 2023 година, кога биле регистрирани 87 случаи. Дополнително, во текот на ланската година активни биле и 4 случаи пренесени од 2024 година.

Кој бара, а кој одобрува прислушување?

Од вкупно 44 нови случаи, иницијатор во речиси сите предмети е Министерството за внатрешни работи (МВР). Само во два случаи иницијативата потекнала директно од Јавното обвинителство, поточно од Обвинителството за гонење на организиран криминал и корупција (ОЈО ГОКК).

Во зависност од сложеноста на кривичните дела, законот дозволува комбинирање на повеќе различни мерки за различни лица во рамки на еден ист предмет. Од вкупно 365 следени лица, за три лица идентитетот останал неутврден.

Какви мерки се користеле најчесто?

Извештајот открива детална слика за методите кои ги користат истражните органи за обезбедување докази кои не можат да се добијат на друг начин:

Следење и снимање надвор од домот: Оваа мерка е најчесто користена – во 33 случаи против 107 лица. Најчесто траела од еден до два месеци, но во 12 случаи таа сè уште е активна.
Прислушување (телефонски и електронски комуникации): Применето во 28 случаи, опфаќајќи 140 лица. Иако просекот е еден до два месеци, во три случаи прислушувањето траело половина година, а во четири случаи и до осум месеци. За 7 случаи мерката е сè уште активна.
Тајни агенти: Во 6 случаи биле користени лица со прикриен идентитет кои се инфилтрирале во организирани криминални групи за да собираат информации од внатре.
Симулиран поткуп: Мерката симулирано давање и примање поткуп била искористена во 6 случаи, опфаќајќи 13 лица.
Озвучување на дом и возило: Најретко користена мерка, применета во само 2 случаи. Во еден од нив, просторот сè уште се снима од страна на тајните служби.

Овие алатки биле клучни во истрагите за најтешките кривични дела: убиства, производство и промет на дрога, перење пари, тероризам, трговија со луѓе и деца, криумчарење мигранти и злоупотреба на службената положба.

ОЈО ГОКК со најмногу случаи, во Гостивар ниту еден

Очекувано, најголем дел од посебните истражни мерки биле применети од страна на Обвинителството за гонење организиран криминал и корупција (ОЈО ГОКК), предводено од Ислам Абази. Ова обвинителство лани водело 20 истраги со помош на ПИМ (18 нови и 2 стари), опфаќајќи дури 335 лица. Според извештајот, ова е логично со оглед на фактот дека тие постапуваат по најсложените предмети.

Сликата во другите обвинителства изгледа вака:

Скопско подрачје: 19 случаи (16 нови) за 16 лица.
Битолско подрачје: 6 случаи за 7 лица.
Штипско подрачје: 4 случаи за 4 лица.
Гостиварско подрачје: 0 случаи (ниту една применета ПИ мерка).

Според оценката во Извештајот, примената на овие мерки е оправдана и успешна.

„Во најголемиот број од случаите каде се применувале посебни истражни мерки се произлезени очекуваните резултати... Успешноста се мери со поведена истрага, поднесено обвинение и добиена осудителна пресуда,“ се заклучува во документот на ЈО.