03 јуни 2026
• од Темелко Тошев
Претседателот на фондацијата „Македонија“, Виктор Стојанов, во своето најново видео-обраќање упати низа контроверзни тврдења и обвинувања кон македонскиот премиер Христијан Мицкоски. Стојанов тврди дека поради застојот во евроинтеграциите, македонските граѓани масовно вадат бугарски пасоши, а саркастично му се заблагодари на Мицкоски за, како што вели, „ребугаризацијата“ на земјата.
На почетокот од своето обраќање, Стојанов ги демантираше неодамнешните написи во дел од македонските медиуми – за кои обвинува дека се под контрола на премиерот Мицкоски – оти тој претходно изјавил дека „Бугарија со пари купува Бугари во Северна Македонија“.
„Пред десетина дена во мое видео-обраќање кажав дека има неколку Бугари од Северна Македонија кои земаат финансиска поддршка од Бугарија, а не сакаат јавно да се покажат како борци за бугарските права... Веднаш излажаа и пуштија информација дека сум кажал оти Бугарија купува Бугари со пари. Тоа е елементарна лага на која наседнаа многу луѓе,“ изјави Стојанов.
Според Стојанов, процесот на интеграција на земјава во Европската Унија е блокиран поради одбивањето на Мицкоски да спроведе „елементарни реформи“, односно да ги внесе Бугарите во Уставот и да ги испочитува обврските од „францускиот предлог“ и Протоколите 1 и 2 од Договорот за пријателство. Но, според него, тоа не претставува проблем за Бугарија, бидејќи македонските граѓани сами наоѓаат пат до ЕУ.
Стојанов изнесе и тврдење поврзано со демографијата, наведувајќи дека голем дел од новороденчињата во државата автоматски добиваат бугарски документи.
„Ако во Северна Македонија минатата година се родени 5.000 македонски деца, барем 500 од нив се бугарчиња, бидејќи нивните родители веднаш им вадат извод на родени во Бугарија. Автоматски, преку тоа што барем еден родител е бугарски државјанин, и тие се бугарчиња. Имаме 500 новородени бугарчиња плус-минус за минатата година во Северна Македонија,“ вели Стојанов.
Стојанов видеото го заврши со саркастична благодарност до македонскиот премиер, притоа употребувајќи навредлива реторика кон македонските граѓани:
„Се надевам дека го разбирате сарказмот, дури и оние кои се со 81 просечно IQ од Северна Македонија. Во наводници му благодарам на Мицкоски за тоа што тој активно ја помага ребугаризацијата на Северна Македонија.“
Ненадминливи Понуди Дневно
4.8 (10276 рецензии)
Заштедете 152.00 ден

