Таравари: Заболените во Гостиварско не пиеле од градскиот водовод, се работи за летен вирус

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

Таравари: Заболените во Гостиварско не пиеле од градскиот водовод, се работи за летен вирус

21 август 2026

• од Темелко Тошев

Поранешниот градоначалник на Гостивар и лидер на Алијансата за Албанците, Арбен Таравари, за првпат јавно проговори за кризата со водата во Гостивар, во гостување на „Тема на денот“ на ТВ Сител. Според него, целата ситуација била прикажана како голем криминал со цел ширење негативна енергија, но тој е среќен што немало посериозни здравствени компликации кај граѓаните.

Таравари тврди дека најголем дел од лицата кои побарале лекарска помош поради стомачни тегоби живеат во места кои воопшто не се приклучени на градскиот водовод на Гостивар, како што се Вруток и Дебреше.

„Повеќето лекари кои работат со овие пациенти сметаат дека се работи за сезонски вирус, а не за бактериска инфекција предизвикана од загадена вода,“ изјави Таравари, додавајќи дека и бројот на прегледани пациенти во болницата во однос на истиот период минатата година е зголемен за само 18 отсто, што е вообичаено за летните месеци кога циркулираат вируси.

Осврнувајќи се на анализите на водата, тој наведе дека од почетокот на годината се направени 310 испитувања. На 28 јуни и на 13 јули сите анализи покажале дека водата била целосно чиста – хемиски, физички и бактериолошки. Проблем се јавил само на 17 јули, кога во само една чешма во една населба била пронајдена бактерија, и тоа во многу ниска концентрација, додека во останатите делови на градот водата била исправна.

Во врска со вклучувањето на пумпите кои внесувале вода во главниот цевковод, што се смета за главна причина за загадувањето, Таравари призна дека тоа било грешка. „Тоа е пропуст на јавното претпријатие кој не смеел да се дозволи. Меѓутоа, градоначалникот нема увид во оперативните активности на претпријатието, освен тоа што го именува директорот. Не може еден градоначалник да знае сè што се случува на терен,“ се оправда Таравари, нагласувајќи дека општината досега молчела за да не ја попречува истрагата, но наскоро транспарентно ќе ги објави сите податоци.

Потсетуваме, водата во Гостивар беше забранета за пиење од 17 јули, откако според надлежните, преку непрописно поставени пумпи од ЈП „Комуналец“ во системот била внесена загадена вода. Ова предизвика масовни стомачни тегоби кај голем број граѓани, по што беше извршено хиперхлорирање на водоснабдителниот систем. Од 14 август, по добиените задоволителни резултати од ИЈЗ и од ЈП „Водовод и канализација“-Скопје, водата е повторно прогласена за безбедна за пиење, со што заврши триесетдневната кризна состојба. За овој инцидент беа уапсени три лица, меѓу кои и директорката на гостиварски „Комуналец“.