Денеска 28 февруари 2026 година се празнува Тодорова сабота

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

ДРУГО

Денеска 28 февруари 2026 година се празнува Тодорова сабота

28 февруари 2026

• од Станча Јаќимовски

Денеска се празнува Тодорова сабота – првата сабота од Великиот пост, посветена на преславното чудо со коливото на светиот и славен великомаченик Теодор Тирон.

Овој празник нè враќа во времето на царот Јулијан Отстапник, кој по смртта на Констанциј, синот на светиот цар Константин, отпаднал од христијанската вера и повторно го вовел идолопоклонството. Иако се откажал од јавно и свирепо гонење на христијаните, смислил подмолен начин да ги оскверни.

Во првата седмица од Великиот пост, царот му наредил на градскиот управник да ја тргне чистата храна од пазарите и да ја замени со лебови и пијалаци осквернети со крв од идолски жртви. Намерата била оние што постат, купувајќи од пазарот, несвесно да се осквернат.

Но, по Божја промисла, оваа завера му била откриена на свети Теодор Тирон. Тој му се јавил на архиерејот Евдоксиј и го предупредил да го извести народот да не купува ништо од пазарите. Кога архиерејот прашал што ќе јадат сиромашните, свети Теодор одговорил: „Нека јадат коливо“ – варена пченица.

Верниот народ го послушал советот и така бил запазен од осквернување. Кога царот видел дека неговата намера пропаднала, наредил повторно да се продава вообичаената храна. Во благодарност за избавувањето, христијаните ја определиле оваа сабота да се слави во чест на свети Теодор, а коливото останало како симбол на Божјата заштита и победата на чистотата над лукавството.

Светиот свештеномаченик Поликарп, епископ Смирненски

На овој ден Црквата го спомнува и светиот свештеномаченик Поликарп Смирненски, епископ Смирненски.

Тој се родил како незнабожец, но во христијанската вера го вовел и го крстил светиот апостол Јован Богослов. Рано останал без родители, а го посвоила благородна вдовица по име Калиста, која го воспитала во побожност и милосрдие.

Поликарп бил ученик на апостолите и ревносен следбеник на Христовото учење. Бил ракоположен за презвитер од епископот Вукол, а по неговата смрт бил избран и хиротонисан за епископ на Смирна. Уште од почетокот имал дар на чудотворство: исцелувал болни, изгонуваал демони, со молитва запирал пожар и измолувал дожд во сушни времиња.

Пострадал во времето на царот Марко Аврелиј, во 167 година, на Велика сабота. Три дена пред смртта прорекол дека ќе биде фрлен во оган заради Христа. Кога бил изведен на суд и повикан да се одрече од верата, одговорил: „Не можам да менувам подобро за полошо!“

Иако бил положен на клада, пламенот не го допрел. Потоа бил прободен со копје, а по смртта неговото тело било запалено. Со своето мачеништво останал пример за непоколеблива вера, трпение и љубов кон Бога.

Преподобен Дамјан Есфигменски

Се спомнува и преподобниот Дамјан Есфигменски, монах од манастирот Есфигмен на Света Гора.

Бил современик и другар на свети Козма Зографски. Се подвизувал во строг монашки живот на гората Самарија, меѓу манастирите Есфигмен и Хилендар. Се упокоил мирно во 1280 година. Според преданието, од неговиот гроб четириесет дена се ширело прекрасно благоухание – знак на неговата светост.

Тропар на свети Поликарп

Велик учителу на Црквата Христова, епископе Божји со благодат преисполнет, поучуван од апостолите, дар за пророкување ти беше подарен, Поликарпе, храбар Господов подвижнику, со мноштво венци овенчан, огнот светоста твоја не ја допре, моли се, свети мачениче, да поднесуваме сè со смирение и трпеливо да ги спасуваме нашите души.

Тодорова сабота нè потсетува на силата на верата, на Божјата промисла и на победата на духовната чистота над секоја подмолност. Преку примерот на светите маченици, верниците се повикуваат на трпение, смирение и непоколеблива верност кон Христа.