Средба во Будимпешта може да го укине шенгенското вето за Бугарија и Романија

Австриските медиуми јавуваат дека средба на министрите за внатрешни работи на Бугарија, Романија и Австрија, која ќе се одржи во Будимпешта, може да го разбие „шенгенскиот јазол“. Средбата, што ќе се одржи на 22 ноември, е организирана под покровителство на унгарското претседателство со ЕУ, а Министерството за внатрешни работи на Австрија потврди дека австрискиот министер за внатрешни работи, Герхард Карнер, ќе учествува.

„Се движиме по правилниот пат, но сè уште не сме ја постигнале целта“, изјави Карнер, потврдувајќи го своето присуство на средбата во Будимпешта. Според него, со отворањето на воздушните и морските граници е направен значителен напредок во заштитата на надворешната граница на ЕУ. Австрија постави услови за целосно укинување на ветото, меѓу кои се зголемување на средствата за заштита на надворешните граници и поинтензивни гранични проверки меѓу Бугарија и Романија.

На новинарско прашање дали може да се очекува австриското вето да биде укинато, Министерството за внатрешни работи на Австрија одговори со статистички податоци кои покажуваат значително намалување на бројот на нелегални преминувања преку границите на Бугарија и Романија за 46% и 10% соодветно во споредба со истиот период лани.

Следната средба на министрите за внатрешни работи на ЕУ е закажана за 12 декември, кога според австриските медиуми, постои можност за укинување на ветото.

Вечерва се очекува да бидат разгледани предлозите на Австрија за нов комесар за миграција на ЕУ, Магнус Бруннер, кој минатиот месец го изрази своето изненадувачко мислење за поддршка на укинувањето на ветото против Бугарија и Романија, со што зазеде спротивставен став од неговиот партиски колега, министерот Карнер.