САД уништија проектили и брод на Хутите во Јемен
Американската војска во четвртокот соопшти дека уништила две противбродски балистички ракети и беспилотен површински брод истрелан од јеменските Хути.
„Утврдено е дека ова оружје претставува непосредна закана за коалициските и трговските бродови во регионот“, напиша Централната команда на САД во X, пренесува Ројтерс.
Јеменската група Хути доцна во четвртокот вети дека ќе изврши поефективни напади врз бродовите поврзани со Соединетите држави, Обединетото Кралство и Израел, јавува Anadolu Agency.
„Имаме големи планови за идни напади кои ќе имаат поголемо влијание врз непријателските бродови“, рече водачот на групата, Абдул-Малик ал-Хути, во снимениот говор.
Без да открие детали за плановите, тој додаде дека „продолжуваме сè повеќе да ги прошируваме воените операции.“ Потсетуваме дека во четвртокот стана јасно дека два танкери натоварени со нафта и токсичен отпад се заглавени во Црвеното Море на линијата на борби меѓу вооружените сили на САД и јеменските Хути.
Досега, повторените обиди на ОН да ги испразнат и преместат бродовите за да се избегне излевање беа неуспешни.
Само во последната недела имаше неколку случаи на погодени товарни бродови од ракети на Хути. Според нив, нападите се знак на солидарност со Палестинците против воените дејствија на Израел во Газа.