Најголемиот центар за податоци во Бугарија ќе биде во Бургас

Во Бургас се гради најновиот и најголем индустриски центар за податоци во Бугарија, со капацитет од 2 мегавата и површина од 1.200 квадратни метри. Зад проектот стои бугарската компанија Tor Systems, а објектот се очекува да биде готов следната година. Целта е центарот да ги задоволи потребите не само на домашниот, туку и на странскиот бизнис.

Центарот, наречен VOJ (веројатно по кодот на аеродромот во Бургас), се наоѓа на само 10 минути од аеродромот и е сместен на површина од 10 декари. По завршувањето, објектот ќе располага со повеќекратно обезбедени системи за напојување, поврзаност и ладење на серверите, како и 24/7 обезбедување и техничка поддршка. Според информациите од Tor Systems, центарот ќе користи 100% „зелена“ енергија во своето секојдневно работење и се наоѓа во близина на трафостаница.

Tor Systems е основана во 2018 година, а проектот за овој центар почнал да се подготвува приближно од тогаш. Земјиштето е купено во 2020 година, а оваа година започна изградбата. Веќе сега компаниите можат да резервираат капацитет во објектот.

Во моментот, во Бугарија има вкупно околу 30 центри за податоци кои се во функција или во изградба. Побарувачката за вакви капацитети расте на глобално ниво поради дигитализацијата и автоматизацијата кои навлегуваат во речиси сите сектори од економијата.

Зошто Tor Systems го избра токму Бургас, кој сè уште не бил домаќин на ваков тип проекти? Од компанијата велат дека градот има стратешка положба спрема Европа, Азија и Блискиот Исток, а помекиот климат може да ги намали трошоците за ладење, со релативно мал ризик од природни катастрофи. Дополнително, близината до морето, развиената инфраструктура и очекувањето за квалификуван кадар го прават Бургас привлечна локација.

Во моментов, компанијата активно бара кадри за неколку позиции, што дополнително ќе придонесе за економскиот развој на регионот.