Кукерите го преплавија Карлово: Стар бугарски обичај ги брка злите сили

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

СВЕТ

Кукерите го преплавија Карлово: Стар бугарски обичај ги брка злите сили

21 февруари 2026

• од Станча Јаќимовски

Во градот Карлово, во Република Бугарија, се одржа традиционалниот празник Старчовден – дел од богатото бугарско културно наследство. Кукерските игри, кои се карактеристичен бугарски народен обичај, повторно го исполнија централниот плоштад со десетици маскирани мажи и со силниот ѕвон на нивните ѕвонци.

Овој древен ритуал, кој се практикува во различни делови на Бугарија, има за цел симболично да ги избрка злите сили и зимата и да го отвори патот за пролетта. Во Карлово, празникот традиционално се одржува ден пред Сирни заговезни и собира илјадници учесници и посетители од целата земја.

Уште од утринските часови, Карловската котлина одекнуваше од тешките медни ѕвонци. Маскираните мажи, познати како „старци“, облечени во впечатливи и тешки костими, чекореа во ритам, изведувајќи го својот обреден танц. Со секој чекор и со секое заѕвонување тие, според бугарското народно верување, ги бркаат негативните сили и носат здравје, плодност и благосостојба.

Меѓу учесниците беше и групата од градот Банја, предводена од Марија Василева. Таа истакна дека нивните кукери носат автентичен бански сукман и специфични „баџаци“. Нивните маски не се само страшни, туку и убави, бидејќи според локалното бугарско верување, убавината и добрината имаат еднаква моќ да го оттурнат злото.

Танцот што го изведуваат е автентичен за регионот и содржи два главни ритуали. Во првиот, кукерите поставуваат кукла пред млада, неомажена девојка и ја допираат со топуз по рамената и главата – како благослов за брак и потомство. Вториот ритуал, познат како „врзување на лицето“, се изведува пред маж или момче, со симболична желба за здравје и напредок.

И покрај снежното време, атмосферата во центарот на Карлово, Бугарија, беше жива и празнична. Деца и возрасни уживаа во маските, традиционалните бугарски носии и динамичните танци. Ништо не може да ги запре кукерите во Карлово – тие уште еднаш ја потврдија силата на овој стар бугарски обичај и го означија почетокот на празниците со многу енергија и традиционален дух.