Бугарија е почесен гост на Меѓународниот саем на книгата во Подгорица

Бугарија оваа година има чест да биде почесен гост на 19-от Меѓународен саем на книгата и образованието во Подгорица, што свечено беше отворен денес. На отворањето присуствуваше и бугарската потпретседателка Илијана Јотова, која изјави дека ова е големо признание за придонесот на Бугарија во светското и европското културно наследство.

„За нас е голема чест што Бугарија е почесен гост на овој саем. Со тоа се признава бугарскиот придонес во светската културна ризница“, истакна Јотова. Таа додаде дека Бугарија ќе ја претстават некои од најпознатите современи бугарски автори, како Георги Бардaров и Здравка Евтимова, чии дела се преведени на многу јазици.

Во рамките на посетата, денес беше откриена улица со името на Иван Вазов, патријархот на бугарската литература, во историската престолнина на Црна Гора, Цетиње. Јотова потсети дека една од најубавите Вазови песни е посветена токму на Црна Гора. Таа се заблагодари на бугарскиот амбасадор Стефан Димитров за иницијативата, како и на црногорската министерка за култура Тамара Вујовиќ за поддршката. Јотова изрази надеж дека веќе следната година ќе биде можно да се постави и споменик на Иван Вазов во Подгорица.

„Ние искрено веруваме во силата на културата и нејзината порака. Културата е таа што гради мостови меѓу народите и чија порака е мир за иднината“, рече Јотова. Таа додаде дека и во ерата на вештачката интелигенција, човештвото никогаш нема да се откаже од пишаниот збор, затоа што книгата е она што стои најблиску до нас.

Јотова ја истакна и гордоста што Бугарија ја чувствува како држава-гостин, бидејќи мотото на саемот е довербата во книгата. Таа изрази и поддршка за пристапувањето на Црна Гора кон Европската Унија, нагласувајќи дека Бугарија е еден од најголемите лобисти за Црна Гора во европските институции.

Потпретседателката потсети дека оваа година Бугарија одбележува две важни годишнини поврзани со книжевноста – создавањето на глаголицата и прифаќањето на православието како официјална религија. „Така се раѓа една духовна империја – писменост, литература и култура, кои се шират низ целиот словенски свет“, рече таа.

Во рамките на посетата, Јотова се сретна и со градоначалникот на Подгорица, проф. д-р Саша Мујовиќ. Подоцна во текот на денот, се очекува да присуствува на отворањето на бугарскиот штанд на саемот, кое ќе го отвори министерот Мариан Бачев, како и на изложбата „Азбука и историја“, што ќе ја отвори лично Јотова.