Скопје без вода на 40°C – каде исчезнуваат милионите кубици?

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

Скопје без вода на 40°C – каде исчезнуваат милионите кубици?

23 јули 2025

• од Станча Јаќимовски

Додека скопјани се борат со жештини од над 40 Целзиусови степени, делови од градот остануваат без капка вода. Проблемот со водоснабдувањето не е нов, но сега кулминира. Јавното претпријатие Водовод и канализација – Скопје постојано известува за зголемена потрошувачка, намален притисок и прекини во испораката. Но официјалните документи откриваат уште подлабок проблем – водата не само што се троши, туку и мистериозно исчезнува.

Фактурирана само една третина од произведената вода

Во 2024 година, Водовод произвел над 110 милиони кубни метри вода од изворите Рашче 1 и 2, и бунарските полиња Лепенец и Нерези. Но, од таа количина, кај граѓаните се фактурирани само 41,4 милиони кубици – одвај 37,6% од вкупно произведената вода. Ова значи дека две третини од водата никогаш не стигнуваат до корисниците, или барем – не се евидентирани како такви.

Ниту таа што се фактурира – не се наплатува целосно

Според Извештајот на Регулаторната комисија за енергетика и водни услуги, ефикасноста на наплатата изнесува 80,25%, што е пад во однос на минатата година. Со други зборови, дури и таа малку вода што се фактурира, не се наплатува целосно.

Загуби од дотраена мрежа и нелегални приклучоци

Во извештајот на Водовод се посочуваат две главни причини за огромните загуби:

Стварни загуби – истекувања од дотраени цевки, приклучни и транспортни линии;
Привидни загуби – потрошувачка која не се мери или не се фактурира: неправилни водомери, незаконски приклучоци, нечитани состојби.

Ова се хронични проблеми на кои со години наназад институциите гледаат низ прсти, а цената ја плаќаат граѓаните – со прекини, нискиот притисок и отсуство на основни услови за хигиена.

Инвестиции под потребното ниво

Во 2024 година, Водовод инвестирал:

350.000 евра во нови градежни и инфраструктурни објекти,
960.000 евра во опрема,
123.500 евра во нематеријални средства.

Со оглед на тоа дека мрежата која ја одржуваат изнесува над 1.265 километри, овие инвестиции изгледаат симболични, а не стратешки. Проблемите бараат системски пристап, а не крпење на цевки по пријава.

Финансиски аларм – загуби од над 4 милиони евра

Освен технички, претпријатието е и финансиски нестабилно. Независниот ревизор „Форвис Мазарс“ укажува дека ЈП Водовод и канализација во 2024 година остварило загуба од 4,1 милион евра, за разлика од 340.000 евра во 2023 година. Негативните парични текови од оперативни активности надминуваат 9 милиони евра, а значителен дел од финансиското преживување се должи на донации од Европската инвестициона банка.

Дополнително, бројот на вработени е намален, а трошоците за плати пораснале за 28,8 милиони денари.

Ревизорот отворено предупредува: постојат сериозни сомнежи во способноста на претпријатието да продолжи со работа без финансиска поддршка од Град Скопје.

Решението постои, но бара волја

Официјалните извештаи не само што ја опишуваат состојбата, туку го посочуваат и лекот: стратегија за модернизација на водоводната мрежа и активна борба против нелегалните приклучоци. Без овие мерки, ниту едно лето нема да помине без рестрикции, а ниту еден буџет нема да биде доволен.