СДСМ обвинува:5,5 милиони евра за згради – 0 денари за градинка, училиште и катна гаража во Ѓорче

Во пресрет на седницата за ребаланс на буџетот на Општина Ѓорче Петров, советничката од СДСМ и коалицијата, Маја Стојковска, упати жестоки критики кон актуелното општинско раководство предводено од градоначалникот Александар Стојкоски и советничката група на ВМРО-ДПМНЕ.

Според Стојковска, иако со Деталниот урбанистички план (ДУП СО) се предвидува изградба на над 4.000 нови станови и преку 5,5 милиони евра се очекуваат од издавање градежни дозволи, во буџетот за 2025 година, како и во предложениот ребаланс, не се предвидени средства за изградба на детска градинка, училиште и катна гаража – објекти кои, како што посочи таа, биле ветени на жителите од населбата Александрија.

„Ова е визијата на Стојковски и ВМРО-ДПМНЕ за Ѓорче – згради и висококатници, без основна инфраструктура и јавни услуги за граѓаните. Станува збор за сериозен пропуст кој директно го загрозува квалитетот на живот во оваа општина,“ изјави Стојковска.

Таа најави дека советничката група на СДСМ и коалицијата на следната седница ќе предложи конкретни измени на програмите со цел да се обезбедат средства за изградба на овие неопходни објекти.

„Градинка, училиште и катна гаража не се луксуз, туку потреба. Ако веќе се зголемува урбаната густина, мора да се мисли и на основната инфраструктура. Тоа е одговорност кон жителите на Александрија и на цело Ѓорче,“ нагласи таа.

Опозицијата во Советот повика на транспарентно и одговорно трошење на јавните средства и инсистираше дека приоритетите на општината мора да се усогласат со реалните потреби на граѓаните.