Професорот Узунов: Со заемот ја финансираме Британија, не Македонија

Во емисијата „Отворено“ се отвори бурна дебата околу употребата на британскиот заем, при што универзитетскиот професор Ванчо Узунов остро ја критикуваше насоката во која се движат инвестициите и начинот на кој државата ги користи овие средства.

Професорот ја истакна потребата за поинаков пристап кон капиталните инвестиции, наведувајќи дека „капитални инвестиции не се само патишта и мостови, туку пред сè вложување во образование и здравство“. Според него, долгорочниот развој на Македонија не може да се постигне без темелно инвестирање во човечкиот капитал.

„Ако сакаме развој, да ги вложиме сите пари во образованието. Тоа ќе биде вистинска капитална инвестиција. Патишта можеме и сами да изградиме. Проблемот на Македонија не е недостаток на пари, туку недостаток на квалитетно образование и реформи“, изјави Узунов.

Тој предупреди дека заемите склучени со странски држави често се нерамноправни и дека постои ризик британскиот заем да се претвори во уште едно задолжување без конкретен ефект – сценарио кое, како што рече, веќе се има повторено со унгарскиот кредит.

Дополнително, Узунов посочи на системскиот проблем во државната администрација, која, според него, нема капацитет и соодветни вештини за ефикасна реализација на проекти. Тој нагласи дека успехот на секоја инвестиција не зависи само од политичката волја, туку и од функционалноста на институциите што треба да ги спроведуваат тие проекти.

Со оваа критика, Узунов упати јасна порака дека Македонија мора да ја преиспита својата стратегија за развој и приоритетите во трошењето на јавните средства – ако сака да гради одржлива иднина.