Осомничениот сериски убиец од Кумановско бил пријавуван како агресивен уште во средно училиште

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

Осомничениот сериски убиец од Кумановско бил пријавуван како агресивен уште во средно училиште

24 февруари 2026

• од Станча Јаќимовски

Осомничениот за повеќе убиства и силувања во Кумановско, денес 25-годишник, уште како средношколец бил евидентиран како проблематичен, агресивен и со сериозни поведенски отстапувања. Документ изработен во ССОУ „Киро Бурназ“ во Куманово открива дека институциите биле навремено известени за неговото однесување, но останува нејасно дали и какви мерки биле преземени.

Алармантно однесување уште во 2019 година

Според мислење на стручната служба од 29 јануари 2019 година, ученикот често отсуствувал од настава, пројавувал агресија и користел вулгарен речник. Било наведено дека тешко ја разграничувал реалноста од содржините што ги гледал на телевизија, како и дека покажувал несоодветно и наметливо однесување кон припаднички на спротивниот пол.

Во еден инцидент, регистриран на 28 јануари 2019 година, ученикот влегол во просториите на стручната служба, упатувал навредливи зборови кон дефектологот и по затворањето на вратата почнал да ја шутира и удира со раце и нозе. По завршувањето на смената, дефектологот забележала дека ја следи низ градот, по што веднаш ги известила претпоставените. Слично следење пријавила и ученичка од училиштето.

Известени социјални служби и полиција

Стручната служба го проследила мислењето и до Центарот за социјални грижи. Во документот било наведено дека родителите не присуствувале на родителски средби и не реагирале на повиците од училиштето, оправдувајќи се со обврски околу добитокот. Во еден случај, ученикот се пожалил дека бил физички казнуван од родителите, што тие го негирале.

За дел од инцидентите била информирана и полицијата. Меѓу нив е и случај кога ученикот застанал пред продавница со играчка пиштол, предизвикувајќи страв кај граѓаните. Продавачката го пријавила настанот, по што полицијата извршила разговор со ученикот во присуство на дефектолог. Бил составен записник и му била изречена предупредувачка опомена.

До денес нема официјална потврда дали Центарот за социјални грижи презел конкретни мерки по добиеното известување. Ниту полицијата не соопштува детали за тогашните постапувања.

Од ученички инциденти до тешки кривични дела

Седум години подоцна, истиот поранешен ученик е осомничен за повеќе убиства и силувања на жени. Дел од жртвите биле пронајдени мртви во своите домови, без веднаш да биде утврдено дека станува збор за насилна смрт. По последниот случај, истрагата се проширила и опфатила најмалку пет сомнителни случаи.

Во јавноста проговорија и две повозрасни жени кои тврдат дека биле цел на напад, но успеале да се спасат.

Прашања без одговор

Случајот отвора сериозни прашања за координацијата меѓу образовните институции, социјалните служби и органите на прогонот. Документираните предупредувачки сигнали – агресија, следење, закани и нарушена перцепција на реалноста – биле познати уште во 2019 година.

Дали институциите реагирале навремено и соодветно, и дали трагедијата можела да биде спречена, се прашања на кои јавноста сè уште чека одговор.