Најмногу штети од вчерашното невреме во Тетово и Скопје
Најмногу штети од вчерашното невреме кое ја зафати Македонија, се регистрирани во Тетово и во Скопје, а помали во источниот дел од земјава.
Центарот за управување со кризи примала повици за уништени автомобили, поплавени подруми, а едно семејство беше заробено во тетовскиот регион.
Подвозникот на влезот во Тетово беше непрооден поради тоа што беше наполнет со вода, а поплава имаше и на влез на Желино. ЦУК добил дојава и за повредена жена од невремето, односно добила повреда на главата. Интервенирала и Брзата помош.
Во поплавена куќа во општина Јегуновце во с. Сиричино има заглавено семејство, информира Центарот за управување со кризи.
Одрони имаше на неколку патни правци.
Во Скопје, пак, како последица на невремето и падната ограда од мост на влезот во главниот град во Автокоманда, оштетени се неколку возила. Има паднати дрвја, поплавени подруми, паднат дел од куќа.
Штети има и во источниот регион, во пехчевско каде што граѓани пријавиле штети на градинарски насади.
Неколку места останаа без струја. Штетите допрва ќе се утврдуваат.