Лога ги разобличи бившите сопартијци: Ја продадоа каузата за функција

Кренар Лога, член на Алијансата за Албанците лојален на крилото на Зијадин Села, остро ги нападна своите поранешни сопартијци, обвинувајќи ги дека се изманипулирани и заведени од лични интереси, особено од желбата за функција, односно – „фотелја“.

Во јавна објава полна со иронија и директни прозивки, Лога ги коментира случувањата по одлуката на Арбен Таравари да ја напушти Владата. Тој ги потсети своите поранешни колеги на клеветите и манипулациите што ги трпеле неговото и името на другите функционери од таборот на Села, тврдејќи дека тие биле лесно проголтани од опонентите.

„Само Бог знае како се исткаени тие приказни: ‘Ништо не знаете’, ‘фатени сте’, ‘ќе видиме што ќе се случи’, ‘Станале ДУИ’, ‘син на Али’, ‘оцрнети се со зделки’, ‘тендери во коридорот 8’, ‘наскоро ќе бидат уапсени’…“, наведува Лога, алудирајќи на дискредитациите што ги трпел неговиот табор.

Посебно саркастичен е во однос на оние кои претходно се декларираа како анти-ДУИ, а сега, според него, соработуваат токму со тие структури, водејќи се од политички калкулации и поддршката на Курти или Рама.

„Едвај чекам да го видам како оди покрај Фронтот на ДУИ, велејќи: ‘Го направивме тогаш затоа што Курти го побара тоа, го правиме сега затоа што Рама го бара’… А во суштина, бара место – било тоа градоначалник, советник или директор“, додава Лога.

Во објавата, Лога направи јасна разлика меѓу, како што вели, неговиот „идеал“ и „вистина“, и моралот на неговите опоненти кои денес, според него, служат кај истите оние што ги обвинуваа дека се антиалбански.

„Јас со мојот идеал, ти со моралот на антиалбанска влада. Јас со мојата вистина, ти со твојот ‘70%’. Јас наивниот без пакување, ти што очекуваш пакување од градоначалникот“, пишува Лога.

Тој открива дека добил пораки од поранешни сопартијци кои му признале дека денес гледаат дека единството на Алијансата е неопходно, и дека токму на него му го должат тој процес.

„Ниту јас, ниту вие не бараме прошка – затоа што бевте изманипулирани. Но, долгот за обединување на Алијансата околу Зијадин – да, тоа го очекуваме“, порачува Лога.

На крај, тој подвлекува дека вистинско обединување не може да се случи без признавање на направените грешки и именување на виновниците. Неговиот став, објавен на социјалните мрежи, доби поддршка од бројни симпатизери на крилото на АА предводено од Зијадин Села.