Филипче: СДСМ повторно го поднесува законот, 600 евра минимална плата сега

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

Филипче: СДСМ повторно го поднесува законот, 600 евра минимална плата сега

10 февруари 2026

• од Станча Јаќимовски

Пратеничката група на Социјалдемократски сојуз на Македонија (СДСМ) и коалициските партнери денеска повторно ќе го поднесат Законот за измена на Законот за минимална плата, со кој се бара минималната плата да изнесува 600 евра. Законот минатата недела беше вратен од претседателот на Собранието, Африм Гаши, поради, како што беше наведено, технички недостатоци.

Претседателот на СДСМ, Венко Филипче, изјави дека целта била законот да се поднесе до 5-ти во месецот, со што постои обврска истиот да се најде на дневен ред во тековниот месец. „Ќе видиме дали ова одложување беше направено за законот да не се дискутира овој месец“, рече Филипче, додавајќи дека техничките забелешки се надминливи.

Филипче нагласи дека СДСМ целосно ги поддржува барањата на синдикатите, оценувајќи дека минимална плата од 600 евра е неопходна за достоинствен живот, особено во услови кога синдикалната кошничка надминува 65–66 илјади денари, а значаен дел од трошоците се за храна, образование и основни потреби.

Според него, средствата за зголемување на платите може да се обезбедат преку кратење на одредени буџетски ставки. Тој посочи дека категориите 42 и 46 од Буџетот – кои опфаќаат патни трошоци, репрезентација и патувања – можат да се намалат, со што би се обезбедиле околу 7,5 милијарди денари, односно приближно 120 милиони евра, за покачување на минималната плата.

Дополнително, СДСМ предлага државата да ги субвенционира придонесите за зголемените плати во приватниот сектор, со цел товарот да не падне врз работодавачите и да не се наруши нивната ликвидност, а и вработените во приватните компании да добијат повисоки примања.

Филипче потсети дека во претходниот мандат на СДСМ, во услови на кризи, биле реализирани значајни зголемувања на социјалната помош и минималната плата, како и на платите во здравството. „Ако тогаш можеше, денеска не може да се тврди дека нема пари“, истакна тој, критикувајќи ги, како што рече, расипничките политики на актуелната власт и најавите за набавка на нов владин авион.

Претседателот на СДСМ изрази надеж дека законот за минимална плата ќе добие поддршка од сите пратеници, без оглед на партиската припадност, оценувајќи дека станува збор за мерка во интерес на работниците, нивните семејства и подобрување на квалитетот на живот.

Покрај ова, СДСМ најави и поднесување измени на Законот за административни службеници, со цел да се врати претходното ниво на плати за вработените во собраниските служби, за кои тврдат дека со последните измени им биле намалени примањата за околу 30 проценти, што, според партијата, ја компромитира независноста на Собранието.