Коридор 8 не се прави со празни зборови: Северна Македонија ја сопира работата

Поминаа три месеци откако Бугарија го испрати својот технички предлог за изградба на заеднички тунел на границата. Од македонска страна – ништо. Нема документ, нема нацрт, нема конкретна понуда. Само зборување за „средби“, „иницијативи“ и „координации“ што не значат ништо без реална работа и јасно техничко решение. А тоа е токму она што го нема.

Може ли некој навистина да верува дека голем, сериозен проект ќе се реализира со зборување и мејлови? Тунел не се копа со дипломатски изјави. Потребна е вистинска работа – со план, со експерти, со договор. А С. Македонија не покажува ни желба, ни капацитет за тоа.

Сега, државата не преговара, туку намерно одложува. Сѐ е тивко, а тоа тивко – сопира. Некој можеби ќе каже „се чека вистински момент“, но тој момент одамна помина. Бугарија го направи својот дел. Ние не само што не сме подготвени, туку изгледа и не сакаме да бидеме.

Ова не е само за еден тунел. Проблемот е подлабок. Се однесува на начинот на кој работиме како држава. Кај нас уште се мисли дека патот кон Европа се добива со поддршка од странство и убави соопштенија, а не со вистинска работа на терен.

Ако С. Македонија не може да подготви еден обичен технички документ, како ќе изгради цели железнички линии или гасоводи? Како ќе ја води транспортната стратегија? Не може секој проект да заврши како политичка драма без резултат.

Време е С. Македонија да се погледне во огледало. Ако сакаме да бидеме сериозен партнер – треба да се однесуваме како таков. Бугарија го заврши својот дел. Ако сакаме тунел, ако навистина сакаме поврзување и Европа – непоходно е да се работи, не да се чека.

Ако ова е темпото со кое сакаме во ЕУ, подобро е прво да влеземе во реалноста.